Weeklikse gebedsversoeke

PERSOONLIKRomeine 1;1-7

Deur my rekenaar kom ‘n e-pos aangevlieg oor hoe Islam Europa stadig maar seker aan die oorneem is. Ek kom agter dat ek bekommerd raak en wonder wat gaan gebeur as hulle alles oorneem en orals in beheer kom. Hier in ons eie land en selfs nog nader, hier waar ek woon, verloor die kerk grond. Die mense glo nie eintlik meer nie. Hulle steur hulle eintlik nie meer aan God en Jesus en geloof nie. Ek betrap my gedagtes waar hulle die vraag vra: Wie is nou eintlik in beheer? En op ‘n manier is ek dadelik bang en ek wonder of ek nie moet emigreer nie, maar waarheen?

In die tyd van Paulus en die lesers van sy brief daar in Rome, was dit ook soos nou. Net erger. Selfs Israel, God se uitverkore volk, het hulle vertroue in Hom verloor. Hulle het ook gewonder wie in geheer is. En tussen die onsekerheid en vrees het hulle nog minder verstaan van die evangelie. Met hierdie agtergrond skryf Paulus aan die Romeine. Reg aan die begin van sy brief spel hy ‘n paar baie belangrike waarhede heel eenvoudig uit: 2Hierdie goeie nuus is al lankal deur God se boodskappers in die Bybel neergeskryf. 3Dit handel oor God se Seun, Jesus Christus. Hy is ons Here. Hy kom uit die nageslag van Dawid. 4Toe Jesus na sy kruisiging uit die dood opgestaan het, het die Heilige Gees aan Hom die heel belangrikste posisie in die hemel gegee. Hy is daar in die hemel triomfantlik as die Seun van God aangewys. Daarom besit Hy nou al die mag in die hemel en op die aarde.

Amper asof vir ‘n Graad1-klas stel hy vir Jesus kort en kragtig bekend. Ek dit is goed dat ons dit ook weer hoor. Dat dit hier vasslaan in ons gedagtes en dat ons dit deur dik en dun kan glo. Jesus is die Seun van God. Die Een wat aan die kruis moes sterf vir ons sondes sodat ons weer ‘n kans het om hemel toe te gaan. Na die kruisdood is Hy na die doodse dal, maar die dood kon Hom nie vasdruk nie. Jesus het uit die dood opgestaan en toe vaar Hy op na Sy Pa. Daar langs Sy Pa, God die Vader, sit Hy en Hy is in beheer. Hoor jy mooi? Jesus is in beheer en nie net daar bo in die hemel nie, maar ook hier op aarde!

Dit maak nie saak hoeveel myle die ander godsdienste of politieke partye of vreemde mense bymekaarmaak nie. Al sê die statistiek dat 20% mense 80% van die geld in die wêreld besit, moet ons met alles in ons vashou aan die wete dat Jesus nog in beheer is.

Wanneer die storms in jou lewe woed, wanneer jou huwelik se pilare wankel, wanneer die cash flow druk, wanneer jou verhoudings van die pad af beur, wanneer jou gesondheid sukkel, wanneer jy elke dag ‘n hand vol pille moet drink, wannner jou oë begin traan omdat die lewe druk, wanneer alles om jou net eenvoudig te veel word, moet jy aan die een draadjie vasklou: Jesus is nog steeds in beheer van die hemel en die aarde. Ja, dalk het ons ‘n paar dom keuses langs die pad gemaak en al pluk ons die vrugte daarvan, verander dit niks aan Jesus se status nie. Hy bly in beheer. Al klap die skote om baie hoeke in baie lande, God bly in beheer. Hy kan enige tyd Sy hand oplig en met een veeg alles en almal uitwis. Of Hy kan jou probleme vir jou uitwis.

Ja, kyk maar na jou lewe. Hoeveel keer het die uitkoms op die regte tyd sy opwagting by jou deur gemaak? Hoeveel keer is jou gesondheid weer op ‘n skinkbord aan jou bedien? Jesus bly in beheer. So – wanneer jy weer in sak en as wil gaan sit, onthou hierdie belofte wat die Heilige Gees vandag weer aan jou kom bevestig. Volgende keer moet jy dit sommer hardop sê: Al lyk dit nie so nie, al voel dit nie so nie, weet ek en glo ek dat my Verlosser in beheer is!    (Vanuit: Loop en val deur Gerjo Ben Van der Merwe, bl 10-11)

 Gedagte vir die week:. Daar is geen duimbreedte van hierdie aarde nie of Christus sê daarvan “Dit is Myne!”.  ~ Abraham Kuyper (1837-1920)

GEBEDSVERSOEKE

Nico B – kanker

Deon B – kanker

Chrizane dP – in hospitaal

Tienie K – lewerkanker

Koos V – dementia

Sarah C – kanker – herstel na operasie – limfkliere verwyder

Fanie dP – kanker – ontvang immuniteitsbehandeling

Corrie vZ – longkanker

Aneshka B – kanker – onder behandeling

Dina D – beroerte – word tuis versorg

Madeleen M – beroerte – word tuis versorg

Petro C – kanker

Corrie vG – herstel tuis

Elizabeth C – kanker

Stokkie R – kanker

Christa N – kanker – ontvang chemo

Vra die Here om met elke gesins-/familielid van bogenoemde mense te wees. Dat Hy hulle sal omvou met Sy liefde  en genade.

HARTSEER Die dood is ‘n gebeurtenis wat mense se lewens vir altyd verander. Kom ons bid dat hulle die Here se troos en bystand sal ervaar wanneer hulle dit baie nodig het.

ANDER:

Haweloses – snerpende koue winternagte

Droogte – boere wat effek van die (steeds heersende) droogte beleef

ANDER LANDE (Vanuit: Die Saaier)

Litaue: Bid steeds vir die vertaling van die Nuwe Testament in moderne Litaus. Dank die Here vir die groot sukses van die Lewende prentefotografiekompetisie wat ons tieners gehelp het om meer van die Bybel te leer en om hul geloof op ’n kreatiewe manier te deel.

Belarus: Dank die Here vir die verwydering van die hindernis wat die verspreiding van sy Woord in Belarus belemmer het. Bid dat die Bybelgedeeltes wat deur die Versprei saamprojek versprei word, die harte van diegene in nood sal aanraak en dat dit vir die res van die jaar sal voortduur.

STUUR JOU GEBEDSVERSOEKE NA gebed@parke.co.za OF SMS / WhatsApp NA 082 314 2658

Leave a comment